Article by Randy Engelbrecht (P R O – Federated Board of Homing Unions)
Article Published 12 June 2009


Nuwe Besem vir FBHU!
Einde van 'n Era!


Na agtien jaar van absolute uitstekende en getroue diens as voorsitter van die grootste duiwe organisasie in die land, naamlik die Federated Board of Homing Unions het mnr Yusuf Moerat tydens die Raad se 2009 konferensie besluit om die tuig neer te lê.

Op tagtig jarige ouderdom en liggaamlik nie meer so sterk nie was dit seker 'n bitter moeilike besluit, maar mnr Moerat het gevoel die tyd is reg om te gaan en het die leisels oorhandig aan Mnr. Lourens le Roux, vorige ondervoorsitter van die Raad en ook voorsitter van die Blackheath Distrik Duiwe Vereniging.

Yusuf Moerat

Yusuf Moerat verdien werklik al die eer vir die onbaatsigtige uithouvermoë en energie wat hy as voorsitter van die Raad ten toon gestel het om dit so n magtige liggaam te maak. Hy vlieg alreeds duiwe sedert 1943 en was daar met die totstandkoming van die Federated Board sowat 78 jaar gelede. Tydens sy amp het die Raad gegroei vanaf 300 tot ongeveer 700 lede vandag. Sy persoonlike prestasies was nie hier ter sprake nie, maar hy het oor die jare die Raadkampioenskap seker meer as enige ander lid gewen.

Volgens hom was daar vele hoogtepunte, maar die een wat werklik vir hom uitstaan was die jongduiwe (YBS) veiling wat op sy inisiatief ingestel is en oor die jare gegroei het tot dié hoogtepunt van die Raad se wedvlugkalender waar groot kontantpryse gewen kon word. Die kompetisie vir 'n motor het ook 'n onafskeidbare deel van die Raad se wedvlugte geword. 'n Borgskap is ook bekom vir 'n nuwe sleepwa wat die grootste in die land is. 'n Ander hoogtepunt was die eenwording van die sport onder een nasionale liggaam (SANPO) waarvan mnr Moerat later beskermheer geword het.

Een van sy doelwitte wat hy graag nog wil sien is dat die Raad eendag sy eie saal sal bekom waar sy lede alles onder een dak kan doen. In dieselfde asem het hy ook al die lede gelukgewens met hul prestasies die afgelope jaar, veral die Raadskampioen, Mnr. Derek Knoetse en dié wat by die Nasionale hokke so goed presteer het. 'n Spesiale woord van gelukwensing het gegaan aan mnr Anwar Herbert wat die motor twee jaar na mekaar gewen het. Mnr Moerat het sterk gepleit vir die behoud van die motor nadat talle lede met dit wou wegdoen as gevolg van die huidige finansiële krisis in die land. Hy het tog aan die nuwe bestuur gevra om alles in hul vermoë te doen om die sport so goedkoop as moontlik te probeer hou.

Laastens het mnr Moerat 'n pleidooi aan lede gedoen om nooit hul voorgangers te vergeet nie. Om name te noem sou onregverdig wees, maar hy het hom op lede beroep om hul nagedagtenis altyd te eerbiedig en sou graag 'n ere-rol wou voorstel om diegene vir altyd te onthou vir hul onbaatsugtige opofferings deur die jare in die FBHU. Hy het die nuwe bestuur voorspoed toegewens en verseker van sy voortgesette ondersteuning waar dit nog mag benodig word. Hy het ook belowe om sy “regmatige” plek as top duiweboer weer in te neem en die lede gewaarsku om hul maar goed voor te berei vir die nuwe seisoen. Die Raad het hom terstons as lewenslange erelid verkies.

So het die Federated Board of Homing Unions dan afskeid geneem van 'n legende in die duiwesport, 'n man wat diep spore getrap het as duiweboer en as administrateur, 'n man vir wie ons ewig dankbaar sal wees vir sy jarelange diens tot die sport, Yusuf Moerat! Totsiens!


Lourens Le Roux

En so begin die Federated Board dan 'n nuwe era met die aanstelling van mnr Lourens Le Roux as die voorsitter.

'n Man wat alreeds sedert 1962 saam met sy pa met duiwe begin boer het. Na 'n paar wye draaie tot in die Noord Vrystaat het hy hom in 1991 in Kuilsrivier gevestig. In 1998 het hy by die FBHU aangesluit as lid van die Blackheath Homing Society. Met die stigting van die Blackheath & District Homing Union in 2001 was hy verkies as die eerste voorsitter. In 2006 was hy ook gekies as onder-voorsitter van die Federated Board.

Lourens Le Roux sê dat hy besef watter groot skoene hy sal moet volstaan om die Federated Board tot selfs groter hoogtes te lei as sy voorganger en wil graag hulde bring aan mnr Yusuf Moerat vir alles wat hy deur die jare opgeoffer het

Hy voorspel egter 'n blink toekoms vir die Federated Board met die nuwe gees van entoesiasme en visie wat die nuut-verkose amptenare ten toon stel. Met die ondesteuning van al die duiweboere in die organisasie glo hy die Federated Board of Homing Unions kan net van krag tot krag gaan vorentoe.